تورکمن توپراغی غان آغلایار،
تورکمن حالقی آیاق آستیندا دپگیلنیأر
ایرانینگ چأگینده یاشان میلیونلارچا آتا- بابالاریمیز، اجه دیر- مامالاریمیز، اویا هم جیگی لریمیز ظالیم سیاساتینگ الیندن ایزی گیدرلی حورلانیپ گلیأرلر. یورتدا حکم سوریأن پارس میلتچیلیگی سیاساتی اساسیندا قیریق عاصیردان کؤپ دوام ادیپ گلیأن ملی دیلیمیز، دأپ- دستوریمیز آیاق آستیندا دپه لنیأر، ماسغارالانیار. شوونیستیک زأهرلی پارس میلتچیلیک پروپاگانداسی گون گچدیگچه یاش اؤسمرلریمیزینگ بئینیسینی آشا زأهرلیأر. ملی توپراغیمیز رحیمسیزلیک بیلن تالانیپ، گلمشیکلره پایلانیار، حالقمیزینگ بویسانجینا و روحی ارکینلیگینه سالینان بویونتورق بولسا گون سایئن برکه یأر. انتک قارشلیغا قیزقین قورشون بیلن جوغاپ بریلیأر. روحی قیرقینچیلیغینگ یانی بیلن فیزیکی قیرقینچیلیق- دا نشئه ماده لارینگ گینگ یایرادیلماغی بیلن کأمیل لشدیریأرلر. مونونگ اؤزی، یانی بیلن بیرگیدن بی غایراتلیغا سبأپ بولیار. اویالاریمیزینگ پیس یوللارا چکیلمگی آز یالی، نشئه بلاسینا اوچرادیلانلار، هر بیر تورکمنینگ نامیسی بولوپ، اونی گؤزمونجیغی یالی قوراپ گلیأن توپراغینی گلمه شیکلره ساتماغا آلیپ گلیأر. تأزه دوغلان بأبکلریمیزه تورکمنچه آت داقماغینگ غاداغانلیغی یتمه یأن یالی، اوبادیر، شأهر آدلاری- دا پارسلاشدیریلیار. تورکمن توپراغی نینگ طبیغاتی- دا بئیله ظالیم سیاساتدان اؤز نصیبینی آلیار، توقایلاریمیز یاقیلیپ کوله اؤوریلیأر، کؤللریمیز و آقارلاریمیز قورادیلیار. بیر سؤز بیلن آیدیلاندا تورکمن توپراغی غان آغلایار، دادینا بولسا یتیشیأن یوق.
شئیله آغیر گونلرده حالقا کیم قولداو برملی؟
انه-آتالاریمیز بیزی اؤندوریپ، یتیشدیردیلر، جانلاریندان جان قوشدولار، گؤزلری نینگ مونجیغی یالی یلدن- گوندن قوراپ کماله گتیردیلر. ایندی بولسا گزک بیزده. بار گویجومیز هم قوواتیمیز بیلن اولارا آرقا چیقمالی. بیز بو ملی و روحی بورجومیزی یرینه بوس- بوتین بورچلی. اوندان بویون غاچیرماغا آصلا حاقیمیز یوق، یوغسام اولارینگ آلقیشینا دأل، غارغیشینا سزوار بولاریس. حالقیمیزینگ ادرمن هم باتیر اوغول- قیزلاری گچن اون یئللیقلارینگ دوامیندا اؤز ملی بورچلارینی یرینه یتریپ گلدیلر، یئنگیشلرینگ یانی بیلن یئنگلیشلره هم اوچرادیلار. گؤرش المیداما یئنگیش بیلن همراه بولمایار. کأبیر پورصاتلاردا نه گؤرکانا ییگیتلرینی قوربان برملی بولدولار، مونگا قارامازدان قایدوسیزلیق بیلن حالقا، ایله- گونه بولان بورچلارینی یرینه یتریپ گلدیلر هم گلیأرلر.
سونگقی دؤرده دورلی سیاسی توپارلانشیغینگ آدی آستیندا ییغناشان ییگیتلریمیز تورکمن حالقی نینگ چکیپ گلیأن آغیر حوپباتلارینی حالقارا مؤچبرینده جار اتمأگه سینانشیارلار. یؤنه "ایکی ال بیریگیپ یوز یووار"، "یکأنینگ چانگی چئقماز" دییلیشی یالی اگر- ده بار گویجومیزی بیر ماقصادا اوغروقدیرساق اوندا "آلماجاق قالامیز" بولماز.
ملی گؤرش نأدیپ یایبانگلانیار؟
ایرانینگ چأگینده یاشایان دورلی حالقلارینگ وکیللری، ایلایتا- دا یوردی یکه باشینا دولاندیریپ گلیأن و بئیله کی حالقلارینگ اؤسوش-اؤزگرشینه باداق آتیپ گلیأن پارس حالقی نینگ ملتچیلیکلی سیاساتی نینگ آستیندا حورلانیپ گلیأن آذربایجانلی لار، عاراپلار، بلوچلار، کردلر، تورکمنلر و بئیله کی حالقلارینگ وکیللری ملی ارکینلیکلرینی غازانماق اوغروندا اونلارچا یئل بأری گؤره شیپ گلیأرلر. یؤنه غینانساغام کؤپ پورصاتلاردا اولار مکیرلی سیاساتلارینگ پیداسی بولوپ، آلداواچ پلانلارینگ قوربانی بولوپ گلدیلر. یورتدا حرکت ادیأن، اساسان- دا اؤزلرینی "مرکزی" پارتیا و قوراما آدلاندیریپ گلیأن دورلی سیاسی قوراملار، بو حالقلارینگ وکیللرینی اؤز طاراپلارینا چکیپ، اولارینگ سیاسی تجریبه سیزلیکلریندن پئدالانیپ، اولاری اؤز مقصدلارینا قوللوق اتدیرمگی باشاردیلار. یؤنه "بولوت المیداما گونونگ اؤنگونه توتی بولوپ بیلمیشی" یالی، گیچ- ده بولسا حاقیقات ینگ نوری گؤروندی. ایندی آدی آغزالان حالقلارینگ وکیللری، شول ساندان تورکمنلرینگ گؤرشجنگ ییگیتلری "یتیم اوغلان اؤز گؤبه گینی اؤزی کسر" دییلیشی یالی، بئیله آلداوچ هم مکیر سیاساتلارینگ دوزاغیندان چیقدیلار، چیقمادیقلار بولسا ایرو گیچ بو دوزاغی بؤوسیپ، ارکینلیگه چیقارارلار. "آط اورکن یریندن، أر قورقان یریندن" دییلیشی یالی، ایندی بیزینگ گرچلریمیز اولارینگ دورلی رنگکلر بیلن بزه لن سیاسی دوزاقلارینا دوشمزلر. ایندی گؤزلری هم آنگلاری آچیلان ییگیتلریمیز حاچاندا "مرکزی" یا "سراسری" دییلیأن سیاسی قورامالار بیلن اورتاق حرکته گیریلجک بولسا، اولار بیلن دنگ حقوقلی دیقلارینی ثبوت ادیأن شرط نامالار اساسیندا حرکت اتجکدیکلرینی جار ادیپ گلیأرلر. ایندی اولارینگ یوپی بیلن قویا ساللانماجاقدیقلارینی آچیق-آیدینگ دیله گتیریأرلر. بیزینگ ییگیتلریمیز اولارا دال- ده، اؤز حالقینا قوللوق اتجکلر. سبأبی آتا- بابالاریمیز اولارینگ قولاغینا برک نیغتاپ گلدیلر: "بول، بول اؤزونگ بول- حانا نؤکر تاپیلار".
تأزه شرطلر، تأزه حرکتلری طالاپ ادیأر
ادرمن ییگیتلریمیز، اسلامی رژیم حأکمیت باشینا گچندن بأری حالقمیزینگ ملی، سیاسی و مدنی حاق- حقوقلارینی طالاپ ادیپ، آنیق پروگراممالاری جار ادیپ گلیأرلر. اولار بو طالاپلارینی باشدا "مدنی و سیاسی اوجاغینگ" بایداغی آستیندا اؤنگه سورن بولسالار، سونگقی دوورده داشاری یورتلاردا بوسغونلیق یاشایان ییگیتلریمیز دورلی سیاسی حرکتلری اساسلاندیریپ، بو ملی گؤره شی دوام اتدیریأرلر. یؤنه داغنیق یاغدای و هر بیر قورامانینگ آغضالاری نینگ چأکلیدیگی سبأبی گویچلی هم تأثیرلی بیر ایشی اونگاریپ بیلمأن گلیأرلر. ایلایتا- دا ایراندا یاشایان بئیله کی اتنیک حالقلارینگ سیاسی وکیللری بیلن دنگشدیریلنده، بیزینگ سسمیز هم تأثیریمیز، ادیل قویا قاچانینگ سسینه منگزأپ، هیچ یرده اشدیلمأن گلیأر.
بیزینگ ثبتیمزده (یاقین گوندوغاردا) و ایرانینگ ایچینده بولوپ گچیأن یاغدی، تأزه شرطلری طالاپ ادیأر، زامانا لایئقلیقدا حرکت اتمگینگ قاتی دروایس هم واجیـپدیغی گؤرنوپ دوور. مونگا بویون بولمادیقلار، یا- حا بو باریان سیاسی کروندن یوکلرینی ساویپ، اوزنگلیگه سزوار بولار یا- دا باریپ یاتان ایزا قالاق، رئاکسیون گویچلره قوشولمالی بولار. یؤنه بیزینگ آیدینگ پیکیرلی ییگیتلریمیز المیداما دوره باپ حرکت ادیپ گلدیلر و گلیأرلر.
یوقارداقی یاغدایی گؤز اؤنگونده توتوپ داشاری یورتلاردا حرکت ادیأن دورلی سیاسی قورامالارینگ وکیللری، بوتین گویجومیزینگ بیر یره ییغنانماغینی نینگ ضروردیغینا یئنه بیر گزک گؤز یتیریپ، "ملی شورا"، "ملی گنگش"، "ملی- دمکراتیک"، "واطان سؤیرلر بیرلشیگی" و شونگا منگزش قوراملارینگ بایداغی آستیندا ییغنانشماغی تکلیپ اتدیلر. بو آتلاردان بیریسینی سایلاماغینگ چیلشیریملی بولماجاغینی آیدیان بو ییگیتلریمیز، بیر جان- بیر تن بولوپ حرکت ادیپ بولجاغینی اؤنگدن بأری نیغتاپ گلیأرلر.
اساسی پرینسیپلریمیز نأمه دن عبارات بولمالی؟
"بیرلشیگه" آغضا بولوپ گیریأن هر بیر آدام، ایندیوید (فردی) یا- دا قوراما اؤزلرینی بیر ماقصادا قوللوق اتمأگه بورچلی حاساپ ادیأرلر. اول بولسا ایرانینگ چأگینده حورلانیپ گلیأن تورکمن حالقی نینگ ملی، سیاسی و کیملیگینی قوراماق و بوتین یورتدا دموکراتیک بیر دوزگونینگ دؤره دیلمگیندن عبارات.
"بیرلشیگه" سیاسی تایدان دورلی قارایشلی تورکمنلر آغضا بولوپ بیلر. بو اوغوردا بللی بیر سیاسی ایدئولوگیا بؤوت دؤرتمز.
"بیرلشیگ ینگ" اساسی حرکتینی کسگیتله یأن و اونونگ اوغرونی بللی ادیأن دوزگون نامه، حرکته یولباشچیلیق اتجک واقتلایین توپار طاراپیندان تاییارلانیپ، آغضالارا حؤدورلنر. کؤپچولیگینگ سس برمگی بیلن تاصصیقلاناندان سونگرا گویجه گیرر.
"بیرلشینگ" قورایجی یولباشچیلاری (واقتلایین یولباشچیلاری) بللی مهلت بیلن قوللوق اتجک اساسی یولباشچیلارینگ سایلانماغینا ممکینچیلیک دؤره دیأن اولی ییغناغا تاییارلیق گؤرملی.
"بیرلشیگه" آغضالارینگ دورلی یورتلاردا یاشایاندیقلارینی ناظارا آلیپ، یئغناقلارینگ و ماصلاحاتلارینگ، شئیله – ده یولباشچیلاری سایلاماق ایشی، دورلی اینترنت سریشده لری آرقالی شول ساندان پالتاق اوتاقلارداقی ییغنانشیقلاردا و دوشوشیقلاردا هم عامالا آشیریپ بولار.
"بیرلشیک" ایلکینجی حرکتینده مرکزی هلنددأکی بیرلشن ملتلر قوراماسی نینگ "دولتلری طاراپیندان وکیللری بولمادیق" قوراما آغضا بولار.
