تورکمنیستان و دونیأ تورکمنلری
هر یئلئنگ مائ آیئندا تورکمنیستانینگ پایتاغتئ آشغاباتدا ملی شاهئرئمئز هم فیلوسوفیمیز ماغتئمغولئ پئراغئ نئنگ پوزییا / شئغرئیت گونلری دابارا بیلن بللنیأر، شول دابارانئنگ یانئ بیلن “دونیأ تورکمنلری نینگ گومانیتار بیله لشیگی نینگ” طوی ماصلاحاتئ- دا گچیریلیأر. اونگا اوزالقی ساویت شوروی جمهورییتلرینده، ایراندا، آوغانئستاندا، عراقدا، سوریه ده، تورکیه ده یاشایان تورکمنلرینگ یانئ بیلن اروپادا بوسغـونلیقدا یاشایان تورکمنلردن بیرنأچسی چاغئرئلئیار. باریان تورکمنلرینگ یول حاراجاتئ- دا تؤلنیأر. ماصلاحات، تورکمنیستانئنگ پرزیدنتی و دونیأ تورکمنلری نینگ گومانیتار بیله لشیگی نینگ پرزیدنتی ق.بردیمحمدوفئنگ یولباشچئلئغئندا و حوواندارلئغئندا گچیریلیأر.
۱۹۹۲- نجی یئلدا “گومانیتارئنگ” ایلکینجی ماصلاحاتلارئندا یوردونگ شول واغتقئ پرزیدنتی س.نیازوف: “دونیأنینگ چار طاراپئنا یایران تورکمنلر،ا یندی آتا واطانلئ بولدونگئز، واطانا گلینگ، آرقانگئزدا تورکمن دولتی، الینگیزده تورکمن پاسپورتئ بولار” دیین أهنگده چئقئش ادیپدی. یؤنه اول تأ دونیأسینی تأزه لیأنچأ هم- أ یوردونگ هم- ده “گومانیتارئنگ” پرزیدنتلیک کورسی سینی اؤزوندن باشغا، هیچ کیمه روا گؤرمِدی. اول “د.ت.گ.ب” غوراماسئ بیلن اؤز شاخصئیت کولتینی دونیأنینگ دورلی دؤولتلرینده یاشایان تورکمنلرینگ آراسئندا- دا یائماغا سینانشئپ گلدی. دینگه اونئ اؤوِنلر و تاخیالئ اؤنگونده باش اگن تورکمنلر آتا واطانا چاغئرئلدئ و چاغئرئلئپ گلینیأر، داشاری یورتلاردا یاشایان تورکمنلردن دینگه سانلئجاسئنا، پره زیدنته وفالی لارا تورکمنیستانئنگ پاسپورتئ نصیپ اتدی. تورکمنیستانئنگ غاپئلارئ بولسا دینگه اولارا و اولارئنگ ائنام بیلدییأنلرینه آچئق، غالانلارئنگ یوزونه بولسا اول غاپئ “شارقئلداپ” یاپئلدئ و یاپئقلئغئنا- دا دوریار.
نیازوفئنگ یرینه گچن حأضیرکی پرزیدنت بردیمحمدوفئنگ دؤورونده بو باباتدا اؤزگرشیکلر بولار، یوردا بارئپ- گلمک ینگیللـِشر دییدیک ولین، ینه- ده “اؤنگکی تاس، اؤنگکی حمام”، اویتگأن زات بولمادئ. حاتتا غاراشسئز تورکمنیستانئنگ ایلکینجی داشارئ ایشلر مینیستری، مشهور دیپلومات مرحوم عبدئ قولی یـفینگ جسدی نینگ- ده یوردا التیلمگینه روغصات بریلمدی، شئیدیپ، اول بنده نروژینگ ساویق توپراقلارئندا جایلاندئ.
ویزا گؤرگوسی: تورکمنیستانا ساپار اتمک اوچین ایلکی بیلن داشارئ یورتلاردا بار بولان تورکمنیستانئنگ ایلچی حانالارئندان ویزا سورامالئ. اروپادا بولسا دینگه برلینده، وین ده، لندن ده و بروکسل ده تورکمنیستانئنگ ایلچی حانالارئ بار. سوئدده یاشایان بیریسی، بأرسیندن برلینه بارئپ، ویزا سورامالئ. ایکینجیدن، ویزا آلماق اوچین تورکمنیستانئنگ میگراسییا غوللوغئ نئنگ یا- دا داشارئ ایشلر مینیسترلیگی نینگ ماخوللان چاغئرئش حاطئ الینگده بولمالی. اوچونجیدن، ویزا سوراپ دولدورلان بلانکت ینگ آشغاباتدان ماخوللانئپ گلندن سونگرا ویزا بریلمگی مومکین. غاراشسئزلئغئنا قاوشان بئیلـِکی دؤولتلرده بئیله دأل، مئثال اوچین آذربایجانا گیتمکچی بولیانلار ویزانئ باکووه بارانلارئندا آیروپورتئندان آلئپ بیلیأرلر. یؤنه تورکمنیستانا، آتا واطانا سیاحت اتمأگه یا- دا گؤروم- گؤروشه بارماغا سینانشیانلارا گؤرگی بارئنئ گؤرکزیأرلر، دوغروسئ، هنیزم شول اؤنگکی ساویت دوزگونی دوام ادیپ گلیأر.
بیزینگ پیکریمیزچه تورکمنیستانینگ یولباشچئلارئ، دونیأ تورکمنلرینینگ جبیسلشمگینی، بیر ساچاغئنگ باشئندا یئغنانشماغئنئ تویس یورکدن ایسلأنوقلار، ایسلیأن بولسالار اوندا اولارئنگ یورگینده واطانا بار بولان سؤیگونی اؤسدورمک اوچین اینگ بأرسیندن ویزا گؤرگوسینی چؤزردیلر، بارئپ- گلمأگه ینگیللیک دؤره دردیلر. اگر- ده دوغرودانام دونیأنینگ چار کونجونه یایران تورکمنلرینگ قینچئلئقلارئ اولارئ غئزئقلاندئریان بولسا اوندا بأرسیندن یوردونگ پرزیدنتی حؤکمونده، بردیمحمدوف مئثال اوچین ایرانا باراندا (اول انچمه گزک تاهرانا باردئ) بو یورتدا یاشایان تورکمنلرینگ- دا آراسئنا آیلانئپ، اولار بیلن دووز- طاغام دادئشاردئ هم اولارا روحئ تایدان غولداو برردی. ایران دؤولتی تورکمنیستانئنگ دورلی ولایاتلارئندا هر حیلی ادبی- مدنی چأره لر گچیریپ گلیأرکأ، پارس دیلینی و مدنییتینی دورلی یولللار بیلن پروپاگاندا ادیپ گلیأرکأ (ادیل بیرنأچه گون موندان اوزال آشغاباتدا ایرانئنگ ایلچی حاناسی پارس دیلینی اوقایان و یا اوقوولارئنی تماملان تورکمن استیودنتلره بایراق و ساوغات قاوشئردی)، تورکمنیستان حاتتا، ایرانئنگ چأگینده یاشایان تورکمنلرینگ اولی شأهرلرینده کنسول حاناسئنئ- دا آچئپ بیلمأن گلیأر.
اروپادان تورکمنیستانا چاغئرلان تورکمنلرینگ آغلاباسئ دیین یالئ ایرانئنگ دیکتاتور رژیمینه غارشئ گؤرِشیپ، داشارئ یورتلارا غاچئپ آتان و بو دؤولتلردن سیاسئ باش پناه سوران تورکمنصأحرالئ لئلار. البته، یر یوزونده یکه- تأک واطانئمئز بولان تورکمنیستانا هر کیمینگ ارکانا بارئپ گلمأگه دولی حقوقئ بار، یؤنه یؤریته چاغئرئلئپ، اولام پرزیدنتینگ آدئنا، شان-شؤهرات آیتدئرماق،اونونگ اوچین حشلله قاقماقدئرماق تورکمن دأبینه و غئلئغینگا هم عاقئلا سئغماجاق زات، سبأبی نأمه؟
غئنانساغام هنیزم تورکمنسیتاندا حقوق بوزمالارا یول بریلیپ گلینیأر، تورکمنیستان بو باباتدا حالقارا درجه سینده بویون آلان بورچلارئنی یرینه یترمأن گلیأر، یکجه ارکین سؤزه، نشره، جمغئیته یول بریلنوق، گازیت صاحئپلارئ، رادیو- تله گپلشیکلری پرزیدنتینگ اؤوگوسی بیلن دوپ دولئ، تورکمنیستان بای دؤولتـِم بولسا اونونگ ایلاتئ حور- حومسئ یاشایار، گازدان گلیأن گیردجی بولسا “ووردوم شالئغا”، گرکمِجک بینالارئنگ غورلوماغئنا صارپ ادیلیأر، پاراحورلیق، ایشسیزلیک، نشه کشلیک، جلپچیلیک حتدِن آشدئ، زندانلار بولسا حئرئن- دئقئن. آدام حقوقلارئنئ غورایان حالقارا غورامالار بیلن دوشوشماغا سیاسئ بندی لره روغسات برلنوق، نیرأ سر اتسنگ بردیمحمدوفئنگ أپت-أپت صوراتلارئ، پورتـِرتلری گؤزه ایلیأر. اؤنگ “روحناما” حالقئنگ بوینوندان آسئلان بولسا ایندی، بردیمحمدوفئنگ ساغلئق باراسئندا یازان کیتپالارئ، اؤنگ نیازووئنگ قاقاسئ آتامئرات بولسا ایندی مونونگ آتاسئ نئنگ هم قاقاسئ نئنگ آتلارئ مکدپلره، یر- یورده داقئلیار...
تورکمنیستانداقئ شئیله حقوق بوزمالار حالقارا جمغئیتچیلیگی نینگ اونسوندن دوشنوق، اولار بو دولتده آدام حقوقلارئ نئنگ یرینه یتیریلمگی اوچین تورکمن حأکیمییتلرینی چاغئرئپ گلیأرلر، چم گلن یرده پروتستلرینی بیان ادیأرلر. شولار یالئ یاغدایدا تورکمن حالقی، تورکمنیستانلی لار، اروپادان باران و اؤزلرینه تورکمن روشنفکرلری حاساپلایانلارا نأحیلی باها برر، حالقارا جمغیتچیلیگی نأمه دییر؟. “بولار دوین-أ ایرانئنگ دیکتاتور رژیمینه غارشئ گؤرشدیک، چأره سیز داشاری یورتلارا غاچئپ گلدیک دیییأردیلر، بو گون بولسا دیکتاتورئنگ تورکمن گؤرنوشینی غولدایارلار” دییمزلرمی؟
No comments:
Post a Comment